<<<اجمل ماسمعت اذناي >>>
ماتقبلت الفراق ماليدي فيه حيله
اه لو ان الظروف المقبله تكشف قدرها
لو يعرف الشخص منا وش مع الغيب بيجي له
كان جنبنا المشاكل من قبل يوقع ضرره
ماهقيت الليله جابت الفرقا طويله
لين صارت ليلة امس بعيني اطول من شهرها
والعذاب اللي يذوب بعين من يفقد خليله
عندي اكبر من عذاب العين لو تفقد نضرها
والحبيب اللي صدوده مثل مداته جزيله
صد عني واعرفه لو صد عن حاجه هجرها
كن روحي يوم حست في جفاه وصعب نيله
بشرتني بالضياع وشدة العزم لسفرها
مارحمها من هلاك وماتقبلها دخيله
تحتضر قدام عينه لين ماتت من قهرها
عاد ليت اللي ذبحها وارهب الموت بوسيله
مادفن وجه الضحيه والسكاكين بنحرها
ليت قلبه يوم سوى فعلته كمل جميله
لو غسلها من عروقه وبكفن صدره قبرها
من حفر بضلوع قلبه حفرة تكفي قتيله
ليه يدفن قتيله بالضلوع اللي حفرها
اشتكيته للرفوف وللبراويز الهزيله
وانذعرت من النياح اللي سمعته في صدرها
رحت اسولف للجبال الصم عن قصة رحيله
ماتركت متونها الا ينحت الدمع بصخرها
واحد حقق جماله كذب اساطير الف ليله
يسكن السبع البحور ويحبس الحور بدررها
الدروب بكبرياها ترتجف تحته ذليله
والورود اللي تقبل خطوته تنبت باثرها
والغصون اليا بغها تنثني له تنثني له
والفياض ان حب ينثر عطرها يلمس زهرها
لو يصوت للغذير المنجرف جفف سبيله
وان تبسم للجبال الصامته نطق حجرها
كل حاجه تستوي له لي بغاها تستوي له
بالنضر واستغفر الله لو بقول انه سحرها
ذاك لو بس يتمنا فاكهة شجره ضليله
بس يفتح راحت ايده ويتساقط له ثمرها
كن ربي سخرله المعجزات المستحيله
واصبح اسطوره وكل الالسنه تنقل خبرها
هان محجر دمع عيني لين جفف سلسبيله
والتفت لاخير دمعه قبلت يده ونثرها
دمعه كن بشقاها يوم طاحت في شليله
جادل جات بدوي تطلب الستر وسترها
له علي انه ليا من طاح من عيني تشيله
ولي عليه انه يرجع لابتساماتي ثغرها
لو طعوني بالسكاكين بيده تشفي غليله
لاشتريها من عذابي وادفع بدمي مهرها
واطلبه ينهال فيني طعن لين يطيح نعمه بصرها
بس لا يترك عيوني تنحرم نعمة بصرها
له بعيني مثل ما للطهر بالنفس الاصيله
تقطع يدين الردا لو مس شعره من شعرها
مابغيته غير درب شتت اقدام الدليله
مزنة مابللتني واستحيت اطلب مطرها
والعطايا من يدين الخالق للطالب قليله
والوهايب من يد الله للعباد اجل وارها
وان نسيت اني زرعت العشق وحضوضي بخيله
مانسيت ان العطايا تستحق اللي شكرها
صعب تلقى شخص وافي يجزي الطيب بمثيله
والعرب قد قالت ان الناس ماتترك قشرها
20th يونيو 2011, 18:12
